Ҷамҗэ — Лягушка
| Ҷа́мҗэ |
Современный язык нарымских селькупов, стр. 120-121.
Ҷа́мҗэ — Лягушка
Баскончина Зоя Ермиловна, Колпашево-Томск
Чомбе́к / По строкам
| Уго́т ир ко́чек ҷа́мҗэла э̄ӽадэт. | Давным-давно много лягушек было. |
| Табла́ варӷ, кыба́, та́льҗеӷэдэл, ка́җэгэдэл, ха́йӽул э̄ӽадэт. | Они большие, маленькие, бесхвостые, безволосые, глазастые были. |
| Му́ндэл ҷа̄мҗэлат та́мдэр оӄӄэрша́ӈ варгэӽа́дэт: кыт то́пӄэт, ӧт ка́нэӄэн, ня́рӷэт, нӱ́рлаӷэт, кэто́пкал по́ӷэт, шӧ́тӄэт, то́ӷэт. | Весь лягушачий род вместе жили: возле реки, на берегу подальше, на болоте, на лугах, в прибрежном лесу (в лесу возле реки), в смешанном лесу, на озере. |
| Ҷа̄мҗэла важэмбэӽа́дэт, чек ку́рӽадэт (кура́лешпэӽадэт), ӧт па̄дэрӽадэт, у́рӽадэт, хоӄэрӽа́дэт, по̄ланд эннэ́ пактэрӽа́дэт. | Лягушки летали, быстро бегали, в воду ныряли, плавали, ползали, на деревья вверх прыгали. |
| Ҷа̄мҗэла кылп паӄле́шпэӽадэт, нача́т шуньҗе́ӷэт варгэӽа́дэт ай кат нача́т шуньҗе́ӷэт кондэ́шпэӽадэт. | Лягушки нору рыли, там внутри жили и зимой там внутри спали. |
| Табла́ хо́льлап нӱрба́лӽадэт хэ́рлаӽе ы́лӷэн. | Они родники чистили снегами внизу. |
| Кужа́т ӧ́дэт квэ́ттэмба, табла́ эльма̄длап орэмҗэӽа́дэт, ӄу́лан лэ́рлап лэ́рӽадэт. | Когда весна наступала, они детёнышей растили, людям песни пели. |
| Табла́ ӄу́лан а̄ мешпэӽа́дэт кӧ́дэгу: «Ыг кӧ́длел!» | Они людям не давали болеть: «Не болей!» |
| Ӧ́дэт, та́эт, ара́т ҷа̄мҗэла аӽа́ мешпэӽа́дэт ӄу́лан: ку́шпэгу (шыҗя́угу), котэ́ ҷоҷэҗэгу́, твэ́лешпэгу. | Весной, летом, осенью лягушки не давали людям: умирать (помирать), навзничь упасть, воровать. |
| Табла́ ӄу́лап о̄ӷолҗэшпэӽадэт: «Ыг и́шпет ко́чек квэлп кыге́утэ! Ыг и́шпет ко́чек ху́руп маҗӧ́утэ!» | Они людей наставляли: «Не бери много рыбы из реки! Не бери много зверя из тайги!» |
| Табла́ фа э́җэп ӄу́лан тадэмбэӽа́дэт. | Они хорошие вести людям приносили. |
| Табла́ ве́сдэп, ӄу́лап ай ху́рулап, та́лӷэтӄо иттэрӽа́дэт: «Талӷ, талӷ, ма́шэк ыг талӷыдэ̄шпет!» | Они всех, людей и зверей, от клещей берегли: «Клещ, клещ, меня не кусай!» |
| Ныльҗи́ чу́мэл но́мэл эҗ э̄ӽа. | Такая селькупская молитва была. |
| Ҷа̄мҗэ – кавало́з э̄ӽа. | Лягушка идолом (кавалозом) была. |
| Таб оӄӄэрни̇́ шӧт кӧ́ӷэт а̄мдэӽа, ма̄дат а̄ӈ кӧ́ӷэт, ко́нтэрэт кӧ́ӷэт, ма̄дэт кӧ́ӷэт, ай манэмбэӽа́. | Она всегда возле леса сидела, у ворот, около дупла, около дома и смотрела. |
| Нынд ватт арк ҷвэ́ҷэнд э̄ӽа. | Здесь дорога в другой мир была. |
| Ӄу́ла, ху́рула, ти̇́гэл ху́рула, квэ́лла, ҷа́мҗэла а́ндэлбле варгэӽа́дэт. | Люди, звери, птицы, рыбы, лягушки, радуясь, жили. |
| Нынд тапче́л э́дэп (кара́п) Ҷамҗэлто́ квэ́радэт ай нача́ӷэт ҷа́мҗэт ну́челдэп ме̄шпадэт. | Здесь сегодня деревню (село) Чажемто (Лягушачье озеро) называют и там праздник лягушки проводят. |
| Ҷа́мҗэ: ӧт, фэ́рэмҗонд, чанда́нд, ӄоо́л ильса́т, ильма́дланд, нӓлӷу́ланд адэлҗэ́шпат. | Лягушка символизирует воду, дождь, влагу, богатую жизнь, младенцев, женщин. |
| Кужа́т чарҗе́ӷэт надэ́лика че́лэмбы, ҷэ́нҷэӽадэт: «Ҷа́мҗэ че́лэмба». | Когда в семье девочка рождалась, говорили: «Лягушка родилась». |
| Ҷумҗу́п кадле́л: «Хайо́мд пуня́лҗэмбле а̄мда, ӄа́ндарӄ ҷэ́нҷа, нева́т таре́ пахтэрна́, ӄут таре́ у́решпа». | Загадку отгадай: «Глаза выпуча сидит, непонятно говорит, по-заячьи прыгает, по-человечьи плавает». |
| Ныльҗи́ ҷа́мҗэ э̄помында. | Такой лягушка была. |
Чу́мэл җӓре́
Уго́т ир ко́чек ҷа́мҗэла э̄ӽадэт. Табла́ варӷ, кыба́, та́льҗеӷэдэл, ка́җэгэдэл, ха́йӽул э̄ӽадэт. Му́ндэл ҷа̄мҗэлат та́мдэр оӄӄэрша́ӈ варгэӽа́дэт: кыт то́пӄэт, ӧт ка́нэӄэн, ня́рӷэт, нӱ́рлаӷэт, кэто́пкал по́ӷэт, шӧ́тӄэт, то́ӷэт. Ҷа̄мҗэла важэмбэӽа́дэт, чек ку́рӽадэт (кура́лешпэӽадэт), ӧт па̄дэрӽадэт, у́рӽадэт, хоӄэрӽа́дэт, по̄ланд эннэ́ пактэрӽа́дэт. Ҷа̄мҗэла кылп паӄле́шпэӽадэт, нача́т шуньҗе́ӷэт варгэӽа́дэт ай кат нача́т шуньҗе́ӷэт кондэ́шпэӽадэт. Табла́ хо́льлап нӱрба́лӽадэт хэ́рлаӽе ы́лӷэн. Кужа́т ӧ́дэт квэ́ттэмба, табла́ эльма̄длап орэмҗэӽа́дэт, ӄу́лан лэ́рлап лэ́рӽадэт.
Табла́ ӄу́лан а̄ мешпэӽа́дэт кӧ́дэгу: «Ыг кӧ́длел!» Ӧ́дэт, та́эт, ара́т ҷа̄мҗэла аӽа́ мешпэӽа́дэт ӄу́лан: ку́шпэгу (шыҗя́угу), котэ́ ҷоҷэҗэгу́, твэ́лешпэгу. Табла́ ӄу́лап о̄ӷолҗэшпэӽадэт: «Ыг и́шпет ко́чек квэлп кыге́утэ! Ыг и́шпет ко́чек ху́руп маҗӧ́утэ!» Табла́ фа э́җэп ӄу́лан тадэмбэӽа́дэт. Табла́ ве́сдэп, ӄу́лап ай ху́рулап, та́лӷэтӄо иттэрӽа́дэт: «Талӷ, талӷ, ма́шэк ыг талӷыдэ̄шпет!» Ныльҗи́ чу́мэл но́мэл эҗ э̄ӽа.
Ҷа̄мҗэ – кавало́з э̄ӽа. Таб оӄӄэрни̇́ шӧт кӧ́ӷэт а̄мдэӽа, ма̄дат а̄ӈ кӧ́ӷэт, ко́нтэрэт кӧ́ӷэт, ма̄дэт кӧ́ӷэт, ай манэмбэӽа́. Нынд ватт арк ҷвэ́ҷэнд э̄ӽа. Ӄу́ла, ху́рула, ти̇́гэл ху́рула, квэ́лла, ҷа́мҗэла а́ндэлбле варгэӽа́дэт. Нынд тапче́л э́дэп (кара́п) Ҷамҗэлто́ квэ́радэт ай нача́ӷэт ҷа́мҗэт ну́челдэп ме̄шпадэт.
Ҷа́мҗэ: ӧт, фэ́рэмҗонд, чанда́нд, ӄоо́л ильса́т, ильма́дланд, нӓлӷу́ланд адэлҗэ́шпат. Кужа́т чарҗе́ӷэт надэ́лика че́лэмбы, ҷэ́нҷэӽадэт: «Ҷа́мҗэ че́лэмба». Ҷумҗу́п кадле́л: «Хайо́мд пуня́лҗэмбле а̄мда, ӄа́ндарӄ ҷэ́нҷа, нева́т таре́ пахтэрна́, ӄут таре́ у́решпа». Ныльҗи́ ҷа́мҗэ э̄помында.
По-русски
Давным-давно много лягушек было. Они большие, маленькие, бесхвостые, безволосые, глазастые были. Весь лягушачий род вместе жили: возле реки, на берегу подальше, на болоте, на лугах, в прибрежном лесу (в лесу возле реки), в смешанном лесу, на озере. Лягушки летали, быстро бегали, в воду ныряли, плавали, ползали, на деревья вверх прыгали. Лягушки нору рыли, там внутри жили и зимой там внутри спали. Они родники чистили снегами внизу. Когда весна наступала, они детёнышей растили, людям песни пели.
Они людям не давали болеть: «Не болей!» Весной, летом, осенью лягушки не давали людям: умирать (помирать), навзничь упасть, воровать. Они людей наставляли: «Не бери много рыбы из реки! Не бери много зверя из тайги!» Они хорошие вести людям приносили. Они всех, людей и зверей, от клещей берегли: «Клещ, клещ, меня не кусай!» Такая селькупская молитва была.
Лягушка идолом (кавалозом) была. Она всегда возле леса сидела, у ворот, около дупла, около дома и смотрела. Здесь дорога в другой мир была. Люди, звери, птицы, рыбы, лягушки, радуясь, жили. Здесь сегодня деревню (село) Чажемто (Лягушачье озеро) называют и там праздник лягушки проводят.
Лягушка символизирует воду, дождь, влагу, богатую жизнь, младенцев, женщин. Когда в семье девочка рождалась, говорили: «Лягушка родилась». Загадку отгадай: «Глаза выпуча сидит, непонятно говорит, по-заячьи прыгает, по-человечьи плавает». Такой лягушка была.